ԵՊԲՀ-ի նոր նախաձեռնությունը կմեկնարկի Արցախում

Երիտասարդ բժիշկների և ԵՊԲՀ ուսանողների խումբը՝ պրոռեկտոր Գառնիկ Ավետիսյանի գլխավորությամբ մեկնեց Արցախ:
Բժշկական համալսարանի նախաձեռնությամբ մշակվել է ծրագիր, որի շրջանակում հանրապետության դպրոցներում և նախադպրոցական հաստատություններում կկազմակերպվեն առաջին բուժօգնության դասընթացներ: Ծրագիրը մեկնարկում է Արցախից, որտեղ ապագա բժիշկները 2 օր շարունակ կսովորեցնեն յուրաքանչյուրի համար կենսական նշանակություն ունեցող հմտություններ։

Առաջին բուժօգնության ծրագրի մասնակիցները կծանոթանան անհրաժեշտ միջոցառումներին՝ տուժածի կյանքը փրկելու և հնարավոր բարդությունները կանխելու նպատակով: Սովորաբար նման օգնություն կարող են ցուցաբերել միայն բժիշկները, սակայն անհրաժեշտ է, որ առաջին բուժօգնության հնարքներին տիրապետեն նաև ուսուցիչները, դաստիարակները, այդ թվում՝ աշակերտները:

Ցանկալի է, որ յուրաքանչյուր քաղաքացի իմանա՝ ինչպես կարելի է վարվել այս կամ այն իրավիճակում՝ սխալ միջամտություններով տուժածին չվնասելու համար։ Ծրագրի հիմքում այն գաղափարն է, որ հաստատության աշխատակիցներն առաջինն են լինում դեպքի վայրում, հետևաբար, առաջին բուժօգնությունը կարող է ճակատագրական լինել, իսկ նրանք պետք է պատրաստ լինեն տարբեր իրավիճակներում:

Արցախից մեկնարկած ծրագիրն անց է կացվում Արցախի Հանրապետության Առողջապահության, Կրթության և Գիտության նախարարների հովանու ներքո։

Դասընթացները կիրականացվեն հունիսի 29-ից, ժամը 10։00-ից Ստեփանակերտի 3-րդ միջնակարգ դպրոցում։ ԵՊԲՀ-ի նախաձեռնած ծրագիրը շարունակական կլինի և կիրականացվի հանրապետության այլ դպրոցներում և նախադպրոցական հաստատություններում։

Հարցեր, պատասխաններ, մեկնաբանություններ